Drehorgel - Shop - Schweighauser

Wenn de wotsch meh erfahre übers Clique Läbe,
denn chasch uf die eigeni Site goo, vo de Zepf.

www.baslerzepf.ch

Motto der Basler Zepf: Frindschaft pfläge, gmietli sy, das soll unser Leitwort sy.

Bisch in Ziri gstrandet und mechtsch Fasnacht mache?
Mir broobe und pflääge d Basler Clique-Kultur in Ziri,
jeede Frytig z Oobe im Zumfthuus zm Wysse Wind.

Unser dis' Jährigs Sujet ; D'HÄÄFELISCHUEL IM BUNDESHUUS

Die erscht Marschproob uf der Allmend in Züri. s'Wätter isch nit grad eso der Hit gsi.

Fasnachtzzettel vo de <<Basler Zepf>>
Ziri 2011

D' HÀÀFELISCHUEL IM BUNDESHUUS

Alli mini Äntli schwimme uff em See,
soone Kindergaarte hesch no niene gsee.

Ziggle, zwänge, grääble, bysse,
die Andere an de Hoor go rysse,
gingge, boxe, hyyle, schreye,
enander s Zyyg an Boode gheie,
dr Ainti het dr Greessewaan,
en Andere verliert e Zaan,
Ains schläggt no schnäll e Dääfi,
dr näggscht mues graad uffs Hääfi.
Dasch kai Kindsgi kunsch nit druus?
S‘isch en Aarbedsdaag im Bundeshuus.

Alli mini Äntli schwimme uffem Meer,
do kunnt dr Ueli Murer und fuerwäärggt mit em Gweer.

D‘ Fraue dääte soowisoo
vo Gweer und Waffe nit verstoo
und kenne doorum Allem aa
zue Waffen au kai Mainig haa.
I find dää Ueli het dr Maage,
was het em soo uffs Hiirni gschlaage,
het in dr Schuel schyynts gaar nyt gleert,
nie nyt vo Amazoone gheert.

Alli mini Äntli watschle in de Sümpf,
d‘ Eveline Widmer spiilt nit gärn mit Schlümpf.

S‘ Eveline duet sich mit grääble und bysse
S‘ Finanzdep under dr Naagel rysse.
Wil am Staatsverdraag sii eppis steert,
macht sy aifach rächts um keert.
D‘ SP die isch ganz verschteert
wil sich daas jo ganz nit gheert.
Zem Drooscht griegt denne d Sommaruga
e Schachtle Schoggeli mit Nuga.

Alli mini Äntli schwimme uff em Bach,
mit dääre Micheline hänn immer alli Grach.

D‘ Calmy-Rey duet zwängele,
stämpfele und au drängele,
wenn‘s denn derfiir e Gläbber git,
steert sy daas im Grund gnoo nit.
Findet aaber s‘syyg fataal
und eppe nit graad kollegiaal.
Wott gaar am Ändi nyt me glinge,
duet sy im Färnsee Bäärndytsch singe.

Alli mini Äntli schwimme uff em Rhy,
syni Äxtraaduure sin fir dr Merz verby

Dr Steinbrück wott en an Marterpfool knoote,
dr Merz duet drufaabe s‘ Bangghaimnis verroote.
Zeerscht dien sy enander dr Bummi schlyffe,
denn raucht men ufaimool d Friidenspfyffe.
Dr Merz luegt ganz benääblet dry,
wie kaa men au soo hilfloos sy?
S‘Maischterstigg isch wie de waisch,

s’Bü… Bü… Bü…Bü… Bündnerflaisch!

Alli mini Äntli schwimme uff dr Neisse,
dr Burkhalter dä sygi ganz e haimlifaisse

Dr Didier duet ganz im stille
de Granggekasse s Kässli fille,
d Optiker die hänn en gäärn
är isch iire Augestäärn.
Bi Fielmann, Visilab und soo,
sygs zue Hamschterkäuf scho koo,
wil d s näggscht Joor sälber zaale muesch,
wenn d Brille erscht denn kaufe duesch.

Alli mini Äntli schwimme uf dr Saale,
wie kaa daas Doris Leuthard nummen eso straale.

S ‘Doris foot for Schregg a schiile,
wo sy z Oslo die falsch Hymne spiile.
Dr Keenig vo deert hauts fascht uus de Sogge,
d‘Frau Leuthard aaber maint nuur drogge,
Maieschtät dasch ganz egaal
miir mache doodruus kai Skandaal.
Do macht dää Kullerauge s‘ isch famoos
fascht wie’s Doris nur nit ganz eso groos

Alli mini Äntli gumpen uff e Hogger,
dr Moritz Leuebärger isch dä ächt e Zogger.

Dr Gscheyter git noo und dr Eesel blybt stoo,
drumm duet dr Moritz au im Novämber goo.
Dr Eesel sy das däät iim aifach stingge,
ans Bai duet är d’Calmy glyych no gingge.
D’Swiss Luftfaartstifig stellt en as Presi aa,
sy Rueeghalt wott är aaber ainewääg haa
dernoode schlieft är waas fiir e Schogg
dr Implenia unschiniert under dr Rogg

Bisch in Ziri gstrandet und mechtsch Faasnacht mache?
Mir broobe und pflääge d’Basler Clique-Kultur in Ziri
jeede Frytig z’Oobe im Zunfthuus zem Wysse Wind.
Deelifoon 043/388 10 88
www.baslerzepf.ch

Sunntig der 6.März, die zweiti Marschproob in Cham am Zugersee.
Bi schönem Wätter hän mer am Umzug
dörfe teillneh und um Schluss hets denn no Wurscht mitemene Brötli und derzue no e Haagebute-Tee gä.
S isch eifach genial gsi.

Es isch sowit, mit der Ladärnevernissage isch der langersehnti Momänt cho, vo de drei schönschte Dääg, im Härz vo jedem Fasnächtler.

Morgestraich

Zyschtig nommitag, Schtubete bi dr Renate,
eifach all Johr schön und denn no mitere tolle Ussicht ufs
Fasnachtstriebe. Au unsere Seppi, sowienen Mueter grueffe hett, isch wieder emool in
top Form.

D' Mamme Afrika,
und no eini us Tunesia.

Meischtens bekömme die wo am spötischte chömme no e Würschtli,
und denn erscht no warm.

Schloof Remonli schlööfele ji,
isch ächtscht di Träumli vomene Änteli,
denn d'Fasnacht isch scho bald vorbi.

Der Fasnachtzzettel hett Monica Tanner gschribe.
Me gseht d'Monica bi der Lätärnevernissage bim vorlääse.

Bummel
Sunntig dr 27.03.2011
Erschti Station Brugg.
Museum Vindonissa.

Unsere Obmaa, liest is öbbis vor
wo er wahnsinnig guet findet.

Zweiti Station Rheinfelden mit em Mittagässe.
Denn mit em Charterschiff MS Froschkönig uff Basel.
Schlusspunkt, s'Gässle in Basel.

Es isch e scheeni Fasnacht gsi und
au die nägschti chunt ganz bestimmt.
dr' Morgestraich isch am Mäntig 27.Februar 2012
4°°Uhr. Mit Larve.- !
Also denn, biss zum nägschte mool.